Kan in pyébwa i vé kontinyé viv, li va sobat pou donn in Flèr. Kèm la tèr lé dir angalé, son Flèr sora ranpli Lamour, pou fé énèt in frwi, pou nirbou arfane lo grin, pou fé nésans in karo zoli pyébwa.
Nout Lang-kozé la énèt konm so pyébwa.
Tanpir-kipé, in bann konbatan la liberté, la déméné pou fé viv ali, fé respèk ali, fé yèm ali, fé pouss ali anzoli-zoli .
Si zordi nou lé fyèr nout Lang-kozé, si nou koz ali, si nou viv ali, sé akoz anparti in Pyébwa i apel Madame Agnès Gueneau. Fanm là, la démavouz la tèr konyé pou nirbou fane lo grin, fé pouss lo plan lo mo-kréol, aroz ali ek Lamour, ek Respé, port ali anlèr ek Mouvman pou nout Drwa Kozé, pou défann ali ziska dovan FR3 Paris. Pou di bana: « Donn in lasiz nout Kozé-Kréol, pa konm in folklor, mé konm in Lang, parsk li lé in Lang».
Zordi nou aprann lo dépar Madame Agnès Gueneau pou son gran voyaz. Angrankèr, nou rann ali omaz, nou di ali Mersi bonpé pou lo grin li la fané, pou pyébwa li la fé pousé, pou siklone li la traversé.
Zordi napwin solman in pyébwa, zordi néna in karo pyébwa i apel la foré Agnès Gueneau.
Mersi Madame.